آژانس ملی اطلاعاتی تاجیکستان (خاور) به نقل از مقام‌های تاجیکستان نوشته است که این ۳ تن از «سازمان تروریستی بین‌المللی» در شب ۲۹ تا ۳۰ اگست سال جاری از افغانستان وارد منطقه «کوران» ناحیه درواز تاجیکستان شده بودند و به تاریخ ۵ سپتامبر با نیروهای اعزامی تاجیکستان درگیر شدند.
درگیری که به کشته شدن تمامی این ۳ عضو جماعت انصارالله، که در تاجیکستان به عنوان یک گروه تروریستی شناخته می‌شود، انجامید.
مقام‌های تاجیکستان می‌گویند که در آستانه روز استقلال تاجیکستان، این ۳ تن برنامه راه‌اندازی حملات تروریستی در تاجیکستان را داشتند.
مقام‌های تاجیکستانی همچنان می‌گویند که در کنار سلاح‌های به دست آمده از نزد این افراد، آنان موفق شده‌اند تا یک مخفی‌گاه پر از سلاح در این منطقه را که در آن مقدار زیادی از سلاح‌های آمریکایی نیز از قبل مخفی شده بودند، کشف کنند.
اینکه این سلاح‌ها به ویژه سلاح‌های آمریکایی چگونه به دسترس افراد جماعت انصارالله تاجیکستان قرار داده شده، مشخص نیست، اما پیش از این، شماری از مقام‌های آمریکایی به شمول دونالد ترامپ، رییسی جمهوری پیشین آمریکا از جاماندن سلاح‌های آمریکایی در نزد طالبان، ابراز نگرانی کرده بودند و برخی‌ها نیز پیش‌بینی کرده بودند که طالبان ممکن اقدام به فروش و دادن این جنگ‌افزارها به گروه‌های تروریستی کنند.
دونالد ترامپ پیشتر با محکوم کردن اداره جوبایدن برای ترک افغانستان، گفته بود که نیروهای آمریکایی ۷۰۰ هزار جنگ‌افزار را در افغانستان زیر حاکمیت طالبان جاگذاشته‌اند. آنچه که به باور ترامپ، طالبان را به دومین فروشنده بزرگ سلاح در جهان تبدیل کرده است.
دریافت رایگان خبرنامهبا خبر-پیامک های ما اخبار را بصورت زنده دریافت کنید
اخبار جهان را با بارگیری اَپ ار.اف.ای دنبال کنید